बाराको सिम्रौनगढ नगरपालिकाको कामकाज एघार दिनदेखि ठप्प



क्रान्ति साह
वीरगन्ज,७ असोज । बाराको सिम्रौनगढ नगरपालिकाका कर्मचारीहरुले ११ दिन देखि सेवा ठप्प पारेका कारण सेवाग्राहीहरु मर्कामा परेका छन् । नगर अस्पताल तोडफोड गर्ने र कर्मचारी कुटपिटमा संलग्नहरु माथि कारबाहीको माग गर्दै सिम्रौनगढ नगरपालिका कार्यालयका कर्मचारीहरुरुले शिक्षा, स्वास्थ्य, वडा कार्यालय र नगरपालिकाबाट दिइने सबै सेवा तथा विकास निर्माणका काम भदौ २८ गते देखि बन्द गराएका हुन् ।

नगरपालिका कार्यालय र त्यस मातहतका सम्पूर्ण कार्यालय ११ दिन देखि ठप्प हुदा सेवाग्राहीहरु मर्कामा पर्नुका साथै विकास निर्माण सम्बन्धि कामहरु पनि प्रभावित भएका छन् । सिम्रौनगढ नगरपालिकाका निमित्त प्रमुख प्रशासकीय अधिकृत वीरेन्द्रकुमार साहले भने आफुहरुको माग पूरा गराउनका लागि गत मंगलबार प्रमुख जिल्ला अधिकारीसमक्ष ज्ञापन पत्र बुझाइएको भएपनि अहिले सम्म कुनै सुनुवाइ नभएको बताउनुभयो ।

अस्पतालमा भएको तोडफोड र कर्मचारीहरुलाइ गरिएको कुटपिट घटनाको छानबिन गरी दोषीमाथि कारबाही र सुरक्षाको भरपर्दो व्यवस्था नभएसम्म आफुहरु काममा नफर्किने साहले बताउनुभयो । नगरपालिकाका कर्मचारी, स्वास्थ्यकर्मीसँगै नगरपालिका कार्यालय तथा अस्पतालमा भौतिक सम्पत्ति तोडफोडले ठूलो नोक्सान भएको भन्दै उहाले आफुहरुलाइ सुरक्षाको प्रत्याभूती नदिए सम्म हडताल जारी नै रहने बताउनुभयो ।

सिम्रौनगढ नगरपालिकाका नगरप्रमुख विजय शंकर यादवले पनि घटनाको छानबिन र दोषीलाइ कार्यवाहीका लागि स्थानीय प्रशासन र प्रहरीले पनि चासो नलिएको बताउनुभयो । अहिले आफु काठमाण्डौमा रहेको भन्दै उहाले कर्मचारीहरुलाइ काममा फर्कन समन्वय गरिरहेको बताउनुभयो ।

बाराका प्रहरी प्रवक्ता प्रहरी नायव उपरीक्षक गौतम मिश्रले पनि अहिले सम्म कसैलाइ पक्राउ नगरिएको बताउनुभयो । घटनाको कारण र घटनामा संलग्नहरुको बारेमा अनुसन्धान भइरहेको भन्दै उहाले छिटटै दोषीलाइ पक्राउ गरिने बताउनुभयो ।

सिम्रौनगढ नगरपालिका–२ मौवाही गाउँका सतिश साहका डेढ वर्षीय छोरालाई सर्पले डस्दा उपचार नपाएर मृत्यु भएको भन्दै मृतकका परिवार र गाउँका केही समूह मिलेर गत भदौ २८ गते सिम्रौनगढको नगरअस्पताल र नगरपालिका कार्यालयमा तोडफोड गरेका थिए ।

शव सहित प्रदर्शनमा उत्रिएको आक्रोशित समूहले कर्मचारी तथा स्वास्थ्यकर्मीलाई समेत कुटपिट गरी घाइते बनाएको थियो । प्रदर्शनकारीको कुटपिटबाट नगरपालिकाका अपाङ्गता शाखाका कर्मचारी प्रयाग महतो सख्त घाइते हुनु भएको थियो ।


प्र तिक्रिया दिनुहोस !

सम्बन्धित खबरहरु

टीकाको उत्तम साइत बिहान १० : ०२ बजे शुरु गरियो
सामुदायिक रेडियो माडीको चौथो अधिवेशन सम्पन्न, नयाँ कार्यसमिति गठन
बडा दसैँको मुख्य दिन आज देखि सुरु, वीरगन्जको प्रसीद्ध शक्तिपिठ गहवामाइ मन्दिरमा पनि हर्षोल्लाशका साथ फुलापाती भित्रयाइयो
नेपालमा पछिल्लो २४ घण्टामा थप ७ सय ८५ जनामा कोरोना भाइरसको संक्रमण पुष्टि