पर्साको छिपहरमाई गाउँपालिकाका किसानहरुलाई यस वर्ष गहुँ बालीमा सिँचाइ गर्न समस्या नपर्ने



३०, मंसिर, माधुरी,
पर्साको छिपहरमाई गाउँपालिकाका किसानहरुलाई यस वर्ष गहुँ बालीमा सिँचाइ गर्न समस्या नपर्ने भएको छ । किसानहरुको खेतमै सोलार प्रणालीको सिँचाइ सुविधा उपलब्ध भएपछि हाल सिँचाइका लागि आकाशे पानी कुर्नुपर्ने बाध्यता हटेको उनीहरुको भनाई छ । खेतमा जडान गरिएका विशाल सोलार प्यानलबाट किसानले घरमै बसेर मोबाइलबाट सिँचाइको पम्पिङ सेट सञ्चालन गर्ने सुविधा पाएका छन् । तराईमै बिल्कुलै नौलो खालको यो सिंचाइ प्रणाली छिपहरमाई गाउँपालिकाको कार्यालयले गत आर्थिक वर्षमा जडान गरेको हो । गाउँपालिकाका अध्यक्ष मनोज साहले वैकल्पिक ऊर्जा प्रवर्द्धन केन्द्रसँगको सहकार्यमा गाउँपालिकामा ४५ वटा सोलार सिंचाइ प्रणाली जडान गरिएको बताउनुभयो । त्यसबाहेक १० वटा यस्तो प्रणाली संघीय सांसद लक्ष्मणलाल कर्णको संसदीय कोषबाट जडान गरिएका छन् । एउटा प्लान्टको लागत ९ लाख ६५ हजार रुपैयाँ परेको छ । सिंचाइ प्रणाली जडान गर्न ६० प्रतिशत रकम वैकल्पिक ऊर्जा प्रवर्द्धन केन्द्रले अनुदान दिएको र बाँकी रकम गाउँपालिकाको कार्यालयले गराएको हो । ४० प्रतिशतमध्ये ३० प्रतिशत गाउँपालिका र १० प्रतिशत किसानको योगदान छ । यसरी गाउँपालिकाले यस कार्यक्रममा १ करोड ५१ लाख रुपैयाँ लगानी गरेको उहाँले बताउनुभयो । प्रत्येक बोरिङबाट एक दिनमा २ लाख लिटर पानी आउँछ । बिहान ७ देखि साँझ ५ बजेसम्म चलाउन सकिने बोरिङ किसानले घरमै बसेर मोबाइलबाट अफ अन गर्ने सुविधासमेत उपलब्ध छ । सम्पूर्ण बोरिङबाट दैनिक ९० लाखदेखि १ करोड लिटर पानी उपलब्ध भइरहेको छ । २ र ३ हर्स पावरका गरी २ थरी बोरिङ छन् । १ सय २० फिट गहिरो बोरिङ गाडिएका छन् । यसअघि गाउँपालिकमा सिंचाइको ठूलो समस्या रहेकोमा हाल भने धेरै राहत भएको अध्यक्ष साहले दाबी गर्नुभयो । जिल्लामै मात्र नभई सिंगो तराईका जिल्लाहरूमध्ये आफ्नो गाउँपालिकामा यस्तो सिंचाइ प्रणाली पहिलोपटक सञ्चालनमा आएको उहाँको दाबी छ । २० देखि ४० वर्षसम्म चल्ने दाबी गरिएको यो सिंचाइ प्रणालीअन्तर्गतको सोलार प्यानलको ५ वर्षको ग्यारेन्टी रहेको उहाँले बताउनुभयो ।


प्र तिक्रिया दिनुहोस !

सम्बन्धित खबरहरु

नवलपरासीका मिटर ब्याज पीडितको काठमाडौंमा आन्दोलन
पालिका चुनावको लागि उम्मेदवारी दिनेको संख्या एक लाख ५२ हजार नाघ्यो मनोनयन दर्ता भएका उम्मेदवारको नामावली आज प्रकाशन हुने
म्यादी प्रहरी आजबाट परिचालन
स्नातक तहका विद्यार्थीहरु आश्रममा भोजनसेवा